ياراحله يا راحله

جيتي ومشيتي سريع
يا راحلة الله كريم
جددتي جرحا في انتي البديتي قديم
قدمك لابو ابراهيم

كان يوم وداعك يوم
ملك الطبيعة وجوم
حتى الشدر مرسوم
ما هز فرعو نسيم

في دار ملاني بنات
ذرفن رحيق زهرات
زي النحل ملكات
كل الخلية حريم

عسلا نقي ومامون
فيهو الشفا المضمون
رغم اختلاف اللون
ما غش فيهو لئيم

هادي وحضورا خفيف
زي المنام والطيف
انا ما قصدت اقيف
لكن وجيها وسيم

يا ما شغفتي قلوب
والليلي مابي تتوب
لابسي البنفسج توب
زي زهرة البرسيم

ما القوز يريدك صاح
راجيكي كل صباح
كيفن وراك يرتاح
انتي الفراقا اليم

كانت ظلام منشور
ساعة جلبتي النور
ما كرموك يا حور
هم كرموا التكريم

اسمك فطمني زمان
قلبي الملان الحان
كم مرضعات مجان
رفضا وقعد لي يتيم

غيبي وتعالي سريع
زي ما مشيتي سريع
ما الحال وراكي مريع
بعدك حياتنا جحيم

كانت حياتنا جنان
مليانه ريد وحنان
جاني الندا وقد حان
اخرج فانت رجيم